बुलढाणा:- (न्यूज महाराष्ट्र लाईव्ह) प्रतिनिधी अलीम खान,बुलढाणा शहर स्टेशन मधील डीबी पथकाने चोरीस गेलेल्या मोबाईल फोनचा शोध घेऊन ते त्यांच्या मूळ मालकांना परत करण्याची प्रशंसनीय कामगिरी केली आहे. यामुळे नागरिकांमध्ये पोलिसांबद्दलचा विश्वास वाढला असून, शहरभर या कामगिरीचे कौतुक होत आहे.
गेल्या काही महिन्यांपासून शहरात मोबाईल चोरीच्या घटनांमध्ये वाढ झाली होती, ज्यामुळे नागरिक त्रस्त होते. यावर बुलढाणा पोलिसांनी विशेष लक्ष केंद्रित करत, तांत्रिक माहिती आणि गुप्त बातमीदारांच्या मदतीने चोरीस गेलेल्या अनेक मोबाईल फोन्सचा शोध घेतला.
आज 17 जुलै रोजी सकाळी 11 वाजता शहर पोलीस स्टेशनचे पोलीस निरीक्षक रवी राठोड यांच्या दालनात 26 मोबाईल फोन त्यांच्या मूळ मालकांना परत करण्यात आले. यावेळी, आपले हरवलेले मोबाईल परत मिळाल्याचा आनंद नागरिकांच्या चेहऱ्यावर स्पष्ट दिसत होता. अनेकांनी पोलिसांच्या या प्रयत्नांबद्दल कृतज्ञता व्यक्त केली.
26 मोबाईल किंमत पाच लाख वीस हजार रुपये मुद्देमाल शहर पोलिसांनी जप्त केला. विविध ठिकाणावरून हे मोबाईल जप्त करण्यात आले आहे.
याप्रसंगी बोलताना उपविभागीय पोलीस अधिकारी सुधीर पाटील यांनी सांगितले की, “नागरिकांच्या सुरक्षिततेला आणि त्यांच्या मालमत्तेच्या संरक्षणाला आम्ही सर्वोच्च प्राधान्य देतो. चोरीला गेलेल्या वस्तू परत मिळवून देण्यासाठी आमचे पोलीस दल अथक प्रयत्न करत आहे. नागरिकांनीही आपल्या वस्तूंची काळजी घ्यावी आणि कोणत्याही चोरीची घटना घडल्यास तात्काळ पोलिसांना कळवावे.”
बुलढाणा पोलिसांनी केलेल्या या कामगिरीमुळे, केवळ मोबाईल परत मिळाले नाहीत, तर नागरिकांमध्ये सुरक्षिततेची भावनाही वाढली आहे. सायबर गुन्हे आणि मोबाईल चोरीला आळा घालण्यासाठी पोलीस अधिक सक्रिय राहतील, असे आश्वासनही यावेळी देण्यात आले.
About the Author
